Me held oss helst innomhus

– både eg og plantane i denne seine,kalde våren.

Velkommen inn i drivhuset

- som ikkje er heilt ferdig innvendig endå. Det manglar litt panel, lister på 3 glas og ein krane over vasken.

Eg har sydd nye puter og stolane er nymåla, resten er gemalen sin jobb.

Her skal det bli ein spennande krok (trur eg…) for her skal det plantast drueranke i den gamle stampen. Å hildrande du – når brannmannen og eg set oss ned med god vin i glaset og berre kan strekka handa ut etter søte blå druer på greinene – jadå,det er lov å drøyma -

Ein stor kasse med pallekarmar er under arbeid ( skal få nokre strøk måling og litt tekst ) og i den skal det blandt anna veksa sitrontre. Sitronene er allerede store, men endå grøne. Den første Rhododendronen er innkjøpt til Junibakken, den får også vera innomhus ei stund til så den ikkje skal frysa på føtene stakkar. Eføyen har overvintra og ser ut til å klara seg bra.

Og – fordi det framleis er lov å drøyma – ventar eg på ein god og varm 17.mai og seier gratulerar så masse med dagen litt på forhånd!

No skal eg ha meg ein kaffikopp under markisa for å få varmen i skrotten att etter fotostunda i drivhuset.

Ha ein flott dag :0)

Hmmm…

Det er vel på tide å sei vel overstått påske etterkvart? Ser (med forskrekkelse) at siste innlegg er ønske om god påske! Men eg er altså fullt oppegåande og sprudlande i live – så om ikkje så lenge skal eg finna noko å laga innlegg om.

Enn så lenge får de nøya dekan med eit bilde av mine to minste og herlege barnebarn som bur så altfor langt borte (Odense,DK) for håndverk er det dårleg med for tida. Dagane går i bøtteballett og akrobatiske øvelsar under taket, dag etter dag!! Kva i all verden er det som gjer at det ein brukte 2 dagar på før i tida no tek 5 dagar….????? (PS: Du treng ikkje svara på dette spørsmålet )

Me knottast om ikkje så lenge og ha ein fin-fin kveld :0)

GOD PÅSKE!

Ynskjer alle som tittar innom ein riktig god og avslappa påske!

Snart påske ??

Lenge sidan sist ser eg. Tida flyg ifrå meg og i følge kalendaren er påsken rett rundt hjørna, dagane er milde med takdrypp og vår i lufta og eg kjenner det klør i hagefingrane. Rett nok er det ei stund fram til hagestell, men plutseleg er me DER også. I mellomtida kan fingrane pusla med litt påskepynt i staden for.

Ein finn ikkje mykje gult i Nikolineheimen, men til påske synes eg det er fint med nokre gule innslag. Det må vera “100 år sidan” eg laga noko nytt til denne høgtida så i år skal det bli eit par nye ting.

To lysglas med hekla trekk i gult kan lett skiftast ut til andre fargar seinare, og eit lite veggbilde kan lett bli til noko meir “fornuftig”…. Dette koselege motivet med hønemor og kyllingar har eg brodert for å bruka som midtmotiv på ei pute.

Etter nokre gode dagar i Notodden starta eg veka med fullada batteri og tenkte eg skulle få unna all verdens – men kvar vert dagane av – ?? Det er jo nesten HELG att !

Hanekamp og skogens konge.

Så er me snart ferdige med den første månaden i det nye året. Hugsar godt den tida då januar var EVINDELEG LAAAANG…. no er det berre SVUSJ og så er den forbi. Mykje av planane eg hadde for denne månaden står framleis ugjordt, men eg er i gang att med dekormåling og det er eg glad for!!

Litt har eg vist frå før – og i dag kjem det eit par skrin til – STORE skrin og då likar eg meg godt. Store flater å boltra seg på er berre så kjekt! Skog og natur ser eg for meg frå mine mange turar i Tvildesåsen og andre åsar, men når det kjem til fuglar og dyr må eg ha “hjelpebilder” å sjå etter.

Denne veka er det tiurkamp eg har prøvd å formidla – og elg vart det også sjølv om eg har eit heller dårleg forhold til akkurat DET dyret. Eit par episodar som har vore mindre kjekke og som eg helst skulle vore forutan. Men her på skrinet er den ikkje mykje farleg, den kjem i alle fall ikkje inn frontruta på bilen slik den gjorde på Ål ein gong i tida… Her kjem han i elegante og grasiøse steg i kveldinga for å drikka frå det vesle tjernet.

Og tiurane , ja, dei får kjempa vidare om terretoriet og hønene – eg skal opp att på arbeidsrommet for å måla velkommenskilt på store villmarksbord. KJEKT.

Ha ein god dag du også :0)

Sveipa boksar.

Ein kompis av Brannmannen er ein mester med slike boksar (skrin) og eg har ein heil stabel som han har laga. No skal dei  målast på. Dei er så glattpussa og fine at det er ein fryd å jobba med!

Med 20 kalde grader ute kosar eg meg på varmt og godt arbeidsrom om dagane og litt resultat er det vorte.

Eit vintermotiv frista nett no, sjølv om eg veit det ikkje er så veldig lett å selgja når det er sesongprega. Her baksar to kjekke gutar med ski og stavar over ein skigard. Var veldig moro å måla dette!

I føremiddag vart det “kua i den grønne eng”…. Slike motiv sel alltid lett her i bygdene.

Med blues for full guffe på cd-spelaren storkosar eg meg på rommet mitt og er  no i gang med eit STOOORT skrin med tiurleik som motiv. Det kan berre vera kaldt ute – det gjer meg ingen ting så lenge eg kan sitta her og gjera det eg aller helst vil!!

Ha ein god vinterdag folkens :0)

Eg samlar ikkje BERRE på gamle ting.

Av og til – og helst med lange mellomrom – skjer det at eg begynnar å samla på noko nytt også. No har eg visst gått heilt av hengslene for plutseleg samlar eg på meir enn godt er….

Det starta i haust med å bestilla Dompap-serviset frå Firkløveren. Så nydeleg motiv og duse,fine fargar. Kvar månad kjem det pakke i posten med 1 kuvert, middagstallerken/asjett/djup tallerken og ei lita skål. Men som så ofte ; det eine fører det andre med seg…  Frå Magnor passar glasa Antarktis (Vebjørn Sand) så perfekt til dompap-serviset! Så dermed vart det oppstart med å samla på desse glasa også.

Heilt sidan me flytta (det er over 2 år sidan no) har eg leita etter eit nytt kjøkkenservise og NOO har eg funne det eg vil ha! Har bestilt første “pakke” med 4 kuvertar på Glassmagasinet, men har ikkje fått det endå. Dette er eit servise frå Johnson Brothers og heiter Devon Cottage og eg skal samla til 12 av både middag og frukostsett.

Som om ikkje dette skulle vera nok, er det også nye kjelar på gang… HØGST NØDVENDIG egentleg. Eg har aldri kjøpt ein panne nokon gong, alt me har er nesten 40 år eller eldre. Dei fleste var brullaupspresangar i 1974 og resten er arv etter mamma. No syng dei verkeleg på siste verset ein del av dei. Og då eg skulle kjøpa nytt fall valget på blå kjelar frå Le Creuset. Det er emaljerte gryter og tanken er å kjøpa ein og ein panne   for dei er grådig dyre (synes no EG då i alle fall)

Det er sikkert 20 år sidan sist eg hadde noko eg samla på, men som du ser så har eg visst teke heilt av no då… og moro er det! Eg er så gamal at eg veit å gleda meg over kvar ting eg kan kjøpa og sjå fram til den dagen det er komplett. Det er faktisk ei heilt anna kjensle enn å gå til innkjøp av ALT PÅ EIN GONG – heilt sant :0)